Oi, apustis sa prova manna de giobia passada a iscola, seus andàus a Casteddu, in su Bàstioni, impari a is pipius de sa scola de s’infantzia e de sa scola elementari, po contài a modu nostru su chi eus imparau apitz’ ‘e Sa Die de sa Sardigna cun s’agiudu de màistrus e professoris.
Sa di bella puru s’at giudau, ca nci fiat su soli totu su mengianu e tenestis basca meda, bistius comenti feminas e ominis de su 1794!
Su cameraman, màistru Luca, at arregistrau totu su chi eus fatu, is fueddus chi eus nau, is sonus chi eus càntau e imoi at a depi ponni impari is arrogus de film chi ndi funt bessius cun su contu in lingua sarda, italiana e fintzas ingresa, segundu su chi at bofiu su progetu “Cònta nos sa Die - Tell us sa Die”.
Nosu de sa scola mesana nci festis totus, sceti Jessica, scedadedda, est depia abarrai a iscola ca s’est segada sa camba s’atra dì…Sa parti sua dd’ant fata is atrus piciocheddus e…mancu mali, nisciunu s’est acatau de nudda!
Calincunu, bregungiosu, at depiu nai duas, tres bortas sa parti sua ca chistionada tropu a pagu e no s’intendìat sa boxi ma, a s’acabàda, nci dd’eus fata.
In su mentris chi festis càntendi e nendi is fueddus chi depestis nai po sa recita, si funt frimaus a si castiai unu sciacu mannu de stràngius chi fiant a Casteddu po si fai is vacanzas: s’ant fotografau, si castiànt spantàus e, prexiaus, duas turistas americanus s’ant domandau e it’ ‘est chi festis fendi ca oi, po issus, fiat sa di de “torrài gratzia” (Thanks Giving, il giorno del ringraziamento) e, doncas, ant affestau impari cun nosu e si funt intendius, unu pagu, cumenti chi fessint in domu insoru…
Eus passau unu bellu mengianu, eus imparau mèdas cosas de duus mesis a i-custa parti e seus abarraus totus cuntentus.
Torraus gratzias a is babus e a is mamas puru chi s’ant agiudau a si bistiri, chi s’ant donau consillus bonus (torru gratzias a su babu de Jacu!) e a sa Dirigidora, femina meda sensibili a s’impreu de sa lingua sarda in iscola.
